राजस्थानमधील टोंक जिल्ह्यातून एक धक्कादायक आणि थरारक घटना समोर आली आहे. शिकारीच्या शोधात आलेला बिबट्या थेट एका दारूच्या दुकानात घुसल्याने परिसरात एकच खळबळ उडाली. मिळालेल्या माहितीनुसार, बिबट्याने दुकानात शिरताच दोन जणांवर हल्ला केला. या हल्ल्यात दोघेही जखमी झाले असून त्यांच्यावर उपचार सुरू आहेत. अचानक घडलेल्या या प्रकारामुळे नागरिकांमध्ये भीतीचं वातावरण निर्माण झालं. घटनेनंतर स्थानिकांनी तात्काळ दुकानाचं शटर बंद करून बिबट्याला आतमध्येच अडकवलं आणि वनविभागाला माहिती दिली. यानंतर जयपूरहून विशेष पथक घटनास्थळी दाखल झालं. वनविभागाच्या पथकाने सुमारे ५ तासांच्या अथक प्रयत्नांनंतर बिबट्याला सुरक्षितरित्या जेरबंद केलं. या संपूर्ण बचाव मोहिमेदरम्यान मोठी गर्दी जमली होती. सुदैवाने या घटनेत कोणतीही जीवितहानी झाली नाही. दरम्यान जंगलातील अधिवास कमी होणं आणि अन्नाच्या शोधात वन्यप्राणी मानवी वस्तीच्या जवळ येणं, ही चिंतेची बाब असल्याचं तज्ज्ञांनी सांगितलं आहे.