पंढरपूर: आषाढी यात्रेनंतर आता पंढरपूरच्या विठ्ठल-रुक्मिणी मंदिरात नवा वाद उफाळून आला आहे. मंदिर समितीचे व्यवस्थापक मनोज श्रोत्री यांना सक्तीच्या रजेवर पाठवण्याचा निर्णय घेण्यात आला आहे. मंदिर समितीच्या नुकत्याच पार पडलेल्या बैठकीत हा निर्णय घेण्यात आला.

आषाढी यात्रेदरम्यान दर्शन रांगेसाठी उभारण्यात आलेल्या मंडपाच्या ठेक्याबाबत व्यवस्थापक मनोज श्रोत्री यांनी एका ठेकेदाराकडून आर्थिक व्यवहार केला. या प्रकरणाची गंभीर दखल घेत समितीने चौकशीचा निर्णय घेतला असून चार सदस्यांची समिती गठीत करण्यात आली आहे. ही समिती आठ दिवसांत चौकशीचा अहवाल सादर करणार आहे.

या संदर्भात मंदिर समितीचे सह अध्यक्ष गहिनीनाथ महाराज औसेकर यांनी माहिती दिली. आता या प्रकरणाचा पुढील तपास व चौकशी समितीचा अहवाल काय निष्कर्ष देते, याकडे संपूर्ण महाराष्ट्राचे लक्ष लागले आहे.