विजयपुरा (कर्नाटक) : कर्नाटकमधील विजयपुरा जिल्ह्यातील चादचान येथील स्टेट बँक ऑफ इंडियाच्या शाखेत तब्बल पाच दरोडेखोरांनी चित्रपटाला साजेल असा दरोडा टाकला. लष्करी वेष परिधान करून आणि चेहऱ्यावर मास्क घालून बँकेत शिरलेल्या दरोडेखोरांनी कर्मचाऱ्यांना बंधक बनवलं.

या कारवाईदरम्यान त्यांनी बँकेतून तब्बल 58 किलो सोनं आणि सुमारे 8 कोटी रुपयांची रोकड घेऊन पोबारा केला. या घटनेमुळे परिसरात मोठी खळबळ उडाली आहे. घटनेनंतर दरोडेखोरांनी वापरलेली कार महाराष्ट्रातील पंढरपूर परिसरात सोडून दिल्याचे आढळून आले. या पार्श्वभूमीवर कर्नाटक आणि महाराष्ट्र पोलिसांनी संयुक्तपणे सर्च ऑपरेशन सुरू केले असून, दरोडेखोरांचा शोध घेण्यासाठी मोठ्या प्रमाणात गस्त वाढवण्यात आली आहे. या दरोड्यामुळे स्थानिकांमध्ये भीतीचे वातावरण निर्माण झाले असून, पोलिसांकडून दरोडेखोरांना लवकरात लवकर गजाआड करण्यासाठी विशेष पथके तयार करण्यात आली आहेत.