मुंबईकरांसाठी महत्त्वाची बातमी आहे. दक्षिण मुंबईहून थेट पालघरपर्यंत आता सुसाट जाता येणार आहे. मुंबई ते पालघर नॉनस्टॉप प्रवासासाठी महत्त्वाचा ठरणाऱ्या उत्तन-विरार सागरी सेतूच्या डीपीआरला राज्य सरकारची मान्यता मिळाली. यामुळे आता बांधकामाचा मार्ग मोकळा झाला आहे. मरिन ड्राईव्ह ते पालघर या 120 किमीच्या कोस्टल कॉरिडॉरची उभारणी केली जात आहे. त्याचा भाग असलेला उत्तन-विरार हा सागरी सेतू थेट मुंबई-दिल्ली एक्स्प्रेसवेवरून वाढवण बंदराला जोडला जाणार आहे. त्यामुळे मुंबई ते वाढवण बंदर हा प्रवास अवघ्या एका तासात पूर्ण करता येणार आहे. तसंच गुजरात आणि दिल्लीवरून येणाऱ्या वाहनांना विना अडथळा थेट दक्षिण मुंबईला पोहोचणे शक्य होणार आहे.