सातारा-पुणे राष्ट्रीय महामार्गावरील खांबटकी घाटात आज दुपारी एक ट्रक अचानकपणे पेटल्याने मोठी खळबळ उडाली. मुराद भैरवनाथ मंदिराच्या पुढे घाटातील वळणावर ट्रकने अचानक पेट घेतला आणि काही क्षणात संपूर्ण ट्रक जळून खाक झाला. घटनेमुळे महामार्गावरील वाहतूक पूर्णतः विस्कळीत झाली असून वाहनांच्या रांगा लागल्या आहेत. सुदैवाने या आगीत कोणतीही जीवितहानी झाल्याचे वृत्त नाही. आग लागल्याचे कारण अद्याप स्पष्ट झालेले नसून अग्निशमन दलाच्या गाड्या घटनास्थळी दाखल होऊन आगीवर नियंत्रण मिळवण्याचे प्रयत्न सुरू आहेत. स्थानिक पोलीस आणि प्रशासन घटनास्थळी उपस्थित असून वाहतूक सुरळीत करण्याचे प्रयत्न सुरू आहेत.