राज्याचे उपमुख्यमंत्री एकनाथ शिंदे यांनी आज मशाल हाती घेतली. विशेष म्हणजे ही मशाल त्यांच्याच कार्यकर्त्यांनी शिंदेच्या हाती दिली आहे. आज ठाणे जिल्ह्याचे शिवसेनेचे दिवंगत जिल्हा प्रमुख आनंद दिघे यांची जयंती आहे. जिल्ह्यातून शिवसैनिक या ठिकाणी दर्शनासाठी येत आहेत. शिवसेनेचे दिवंगत नेते आनंद दिघे यांचं ठाण्यातील शक्ती स्थळ या ठिकाणी मुंबईमधील शिवडी या ठिकाणाहून आलेल्या दिघे प्रेमींनी उपमुख्यमंत्री एकनाथ शिंदे यांना पेटती मशाल दिली. तसेच शिंदे यांचे आभार मानले. त्यामुळे एकनाथ शिंदे यांनी मशाल हाती घेतल्याची चर्चा मात्र आता चांगलीच रंगली आहे.

पक्ष फुटीच्या राजकरणांतर उद्धव ठाकरे आणि एकनाथ शिंदे असे शिवसेनेचे दोन गट पडले आहेत. यात धनुष्यबाण असलेलं शिवसेनेचं पारंपरिक चिन्ह हे शिंदे यांच्याकडे गेलं आहे. तर मशाल हे उद्धव ठाकरे यांच्या शिवसेनेचं चिन्ह आहे. त्यामुळे आज आनंद दिघे यांच्या जयंतीनिमित्त ठाण्याच्या आनंद आश्रमात आलेल्या शिवसनेच्या कार्यकर्त्यांनी एकनाथ शिंदे यांच्या हातात पेटती मशाल दिल्यावर याची चर्चा आता होत आहे.