राज्यात काही दिवसापूर्वी पडलेल्या अवकाळी पावसाने शेतपिकांचे मोठी नुकसान झाले आहे. द्राक्ष,गहू, डाळिंब या पिकांचे विशेषतः मोठ्या प्रमाणात नुकसान होऊन बळीराजा हा हवालदिल झाला होता. मात्र नेहमी आपल्याच वादग्रस्त विधानाने चर्चेत असणारे माणिकराव कोकाटे यांनी शेतकऱ्यांच्या बांधावर जात त्यांनाच खडेबोल सुनावले.

सरकारने दिलेल्या पैशाची तुम्ही एक रुपयाची तरी गुंतवणूक करता का? त्या पैशांचे तुम्ही पोरांचे साखरपुडे आणि लग्न करता असे बोलून शेतकऱ्यांच्या जखमेवर मीठ चोळण्याचे काम या मंत्री महोदयांनी केले. यानंतर मंत्री कोकटेंवर टीकेचे झोड उठले. मंत्री कोकाटेंच्या निषेधार्थ आज बीडमध्ये ठाकरे गटाने आंदोलन करून त्यांच्या फोटोला जोडे मारत शेण फासले. शेतकरी हा जगाचा पोशिंदा आहे. अवकाळी पावसामुळे शेतीच्या पिकाला तडाखा गेला आहे आणि हे मंत्री असे विधान करत आहे त्यामुळे कोकाटे यांची मंत्रिमंडळातून तात्काळ हकालपट्टी करावी अशी मागणी बीड येथील ठाकरे गटाच्या कार्यकर्त्यांनी केली आहे.