ऐन स्थानिक स्वराज्य संस्थांच्या निवडणुकांच्या पार्श्वभूमीवर उपमुख्यमंत्री एकनाथ शिंदे यांची दिल्लीवारी वाढली आहे. दिल्लीत केंद्रीय गृहमंत्री अमित शहा यांची उपमुख्यमंत्री एकनाथ शिंदे यांनी भेट घेतली. ही बैठक तब्बल ५० मिनिटे सुरू होती. या बैठकीत उपमुख्यमंत्री शिंदेंनी राज्यातील भाजपच्या वरिष्ठ नेत्यांबद्दल तक्रार केल्याची माहिती आहे.

खासदार श्रीकांत शिंदे यांच्या लोकसभा मतदारसंघात भाजपने शिवसेना नेत्यांना प्रवेश दिल्याने एकनाथ शिंदेंनी तीव्र नाराजी व्यक्त केली. याशिवाय, महाविकास आघाडीतील पराभूत उमेदवारांना भाजपात प्रवेश देऊन त्यांना ताकद दिली जात असल्याचाही आरोप करण्यात आला. शिंदे गटानुसार, 'रवींद्र चव्हाण पैसे देऊन मित्र पक्षांचे नगरसेवक फोडत आहेत', असा थेट आरोप करण्यात आला आहे. या बैठकीतील मुद्द्यांमुळे राज्यातील शिंदे गट आणि भाजप यांच्यातील संबंधांवर चर्चा सुरू झाली आहे.