राष्ट्रपती पुरस्कार विजेत्या विठाबाई नारायणगावकर तमाशा मंडळातील पुरुष आणि महिला कलाकारांना मारहाण करण्यात आल्याची घटना समोर आली आहे. संगमनेर तालुक्यातील वरुडी पठार भागात ही घटना घडली. वाहनाला कट मारल्याचा आरोप करत ही मारहाण केल्याची प्राथमिक माहिती आहे. तमाशा मंडळातील कलाकार मारहाणीत जखमी झाले. दुचाकीवरून आलेल्या दोघांनी इतर लोकांना बोलावून मारहाण केल्याचे सांगितले जात आहे. महिलांना शिवीगाळ करत मारहाण केली आणि त्यांचे कपडे देखील फाडण्यात आले. विठाबाई यांचे पुत्र महेश नारायणगावकर यांना देखील मारहाण केल्याचा आरोप आहे. संगमनेर तालुक्यातील घारगाव पोलिस ठाण्यात या प्रकरणी गुन्हा दाखल करण्याचे काम सुरू आहे. या घटनेचा व्हिडीओ समोर आला असून तो व्हायरल होत आहे.