मुंबईच्या विलेपार्ले पूर्व परिसरात एक बेवारस संशयित बॅग आढळल्याने नागरिकांमध्ये एकच खळबळ उडाली आहे. ही बॅग विलेपार्ले पूर्व रेल्वे स्टेशन परिसरात आढळताच तात्काळ पोलिसांना माहिती देण्यात आली.

घटनास्थळी पोहोचलेल्या पोलिसांनी परिसर बंद करत वाहतूक तसेच प्रवासी हालचाल तात्पुरती थांबवली आहे. सुरक्षा लक्षात घेऊन संपूर्ण परिसर कॉर्डन करण्यात आला असून स्टेशनवरील प्रवाशांना सुरक्षित स्थळी हलविण्यात आले आहे.

दरम्यान, बॉम्ब शोधक पथक (BDDS) घटनास्थळी दाखल झाले असून संशयित बॅगेची तपासणी सुरू आहे. बॅगेत काय आहे याची अधिकृत माहिती अद्याप समोर आलेली नाही. काही दिवसांपूर्वीच एनआयएने देशातील प्रमुख शहरातून व्हाईट कॉलर दहशतवाद्यांना अटक केली होती. तसेच दिल्ली येथील लाल किल्ल्याजवळ झालेल्या बॉम्बस्फोटामुळे यंत्रणा अधिक सतर्क झाली आहे.

विलेपार्ले येथील तपासात बॅगेत फक्त कपडे आणि चपला आढळल्याने अफवा खोटी ठरली. या घटनेमुळे प्रवासी आणि नागरिकांमध्ये निर्माण झालेली दहशत वाढली होती. अखेर पोलिसांनी वाहतूक पूर्ववत सुरू केली असून नागरिकांनी सुटकेचा निश्वास घेतला.