विरोधकांपेक्षा गाडीत बसणाऱ्या लोकांपासून सावध रहा असा सल्ला माजी खासदार सुजय विखे यांनी वडील राधाकृष्ण विखे पाटील यांना दिलाय. तर राधाकृष्ण विखे पाटील यांनी देखील सुजय यांच्या सल्ल्यावर प्रतिक्रिया दिलीये. मी सहसा गाडीत कुणाला घेत नाही, मात्र कार्यकर्ते ज्यावेळी गाडीत बसतात त्यावेळी आपले कान पक्के ठेवले पाहिजे असं त्यांनी म्हटलंय. त्यामुळे विखे पिता पुत्राच्या जुगलबंदीची चांगलीच चर्चा होत आहे.

राहुरीचे आमदार शिवाजी कर्डिले यांच्या निधनानंतर रिक्त झालेल्या जागेवर मुलगा अक्षय कर्डिले याला विधानसभेची उमेदवारी द्यावी यासाठी कर्डिले समर्थकांनी मेळाव्याचे आयोजन केले होते. यावेळी पालकमंत्री राधाकृष्ण विखे पाटील, माजी खासदार सुजय विखे, नगरचे आमदार संग्राम जगताप, अक्षय कर्डिले यांच्यासह कार्यकर्ते मोठ्या संख्येने उपस्थित होते. भाषणादरम्यान सुजय विखे यांनी अक्षय कर्डिलेसह वडील राधाकृष्ण विखे पाटील यांना देखील सल्ला देताच उपस्थितांमध्ये एकच हशा पिकला. गाडीत बसणारे कार्यकर्ते सर्वात घातक प्राणी असतात. नेत्याच्या गाडीत बसायला जो घाई करतो तो लावालावी केल्याशिवाय उतरत नाही. त्यामुळे विरोधकांपेक्षा गाडीत बसणाऱ्या कार्यकर्त्यांपासून सावध राहिले पाहिजे असा सल्ला सुजय विखेंनी भर मंचावर दिलाय.