ठाकरे गटातून हकालपट्टी करण्यात आलेले नेते सुधाकर बडगुजर यांचा आज मुंबईत भाजप प्रवेश झाला. पक्षाचे प्रदेशाध्यक्ष चंद्रशेखर बावनकुळे आणि कार्यकारी अध्यक्ष रवींद्र चव्हाण हे यावेळी उपस्थित होते. काही दिवसांपूर्वी सुधाकर बडगुजर यांनी मुख्यमंत्री देवेंद्र फडणवीस यांची भेट घेतली होती. त्यानंतर पक्षात माझ्यासह दहा ते बारा जण नाराज आहेत, असे जाहीर वक्तव्य केल्यानंतर त्यांची ठाकरे गटातून हकालपट्टी करण्यात आली होती.

बडगुजर हे भाजपमध्ये जातील अशी चर्चा सुरू असताना नाशिक पश्चिमच्या आमदार सीमा हिरे यांनी पत्रकार परिषद घेऊन बडगुजर यांच्यावरील गुन्ह्यांची जंत्रीच वाचून दाखवली होती. तसेच भाजपच्या वरिष्ठ नेत्यांना पत्रव्यवहार करत बडगुजर यांना पक्षात प्रवेश देऊ नये अशी मागणी केली होती. मात्र आमदार सीमा हिरेंच्या विरोधाला डावलून आज सुधाकर बडगुजर यांनी कमळ हाती घेतले आहे. त्यांच्यासह ठाकरे गटाचे अनेक माजी नगरसेवक आणि शहराच्या माजी महापौरांनी भाजपमध्ये प्रवेश केला आहे. यामुळे ठाकरे गटाला नाशिकमध्ये सुरुंग लागल्याचे बोलले जात आहे.