अक्षय शिंदे, साम टीव्ही

जालना जिल्ह्यातील धारकल्याण शिवारात काल (७ जून) सायंकाळच्या सुमारास अचानक आलेल्या वादळी वाऱ्याने कहर केला. जोरदार वाऱ्याच्या झोतासह झालेल्या पावसामुळे धारकल्याण येथील शेतकरी रंगनाथ भुतेकर यांच्या घरावरील पत्रे उडाली असून, त्यांच्या संपूर्ण संसारावर संकट कोसळले आहे.

या पावसामुळे भुतेकर यांच्या घरातील साठवलेले अन्नधान्य, संसारोपयोगी वस्तू तसेच दुचाकीचे मोठे नुकसान झाले आहे. घरावरचे छत उडाल्याने सध्या त्यांचा संपूर्ण संसार उघड्यावर आला आहे.विशेष म्हणजे, सध्या खरीप हंगामाची पेरणी सुरू होण्याचा काळ असून, अशा वेळी घराचे छप्पर उडाल्यामुळे शेतकरी आर्थिक अडचणीत सापडला आहे.

रंगनाथ भुतेकर यांनी शासनाकडे तात्काळ पंचनामे करून आर्थिक मदत देण्याची मागणी केली आहे. अन्यथा येणाऱ्या काळात शेतकरी कुटुंबाला मोठ्या संकटांचा सामना करावा लागेल, अशी भीती त्यांनी व्यक्त केली आहे.