आर्थिक वर्ष संपत असल्याने राज्य सरकारकडून निधी खर्च करण्यासाठी जोरदार लगबग सुरू आहे. अर्थसंकल्पात तरतूद केलेला निधी वितरित करण्यासाठी शनिवार आणि रविवार या सुट्टीच्या दिवशीही विविध विभागांनी तब्बल 145 शासन निर्णय काढले. विशेष म्हणजे ही प्रक्रिया रात्री उशिरापर्यंत सुरू होती. मागील आठवड्यात शुक्रवारपर्यंत निधी खर्चाचा टक्का 60 होता, तो रविवारी रात्री 63 टक्क्यांपर्यंत पोहोचला. आर्थिक वर्ष संपायला दोनच दिवस शिल्लक असून इतक्या वेगाने जीआर निघल्याने राजकीय वर्तुळात चर्चांना उधाण आले आहे.