दक्षिण मुंबईतील मरीन लाईन्स परिसरात आज दुपारी एका दुमजली इमारतीला भीषण आग लागल्याने मोठी खळबळ उडाली आहे. आग इतकी भयानक होती की काहीवेळातच संपूर्ण इमारत आगीच्या भक्षस्थानी पडली.

प्राथमिक माहितीनुसार, आगीत दोन गॅस सिलेंडरचा स्फोट झाला असून त्यामुळे परिसर हादरला. सुदैवाने अग्निशमन दलाच्या जवानांनी तत्काळ घटनास्थळी धाव घेत आगीवर नियंत्रण मिळवण्यासाठी युद्धपातळीवर प्रयत्न सुरू केले होते.

या घटनेची माहिती मिळताच मुंबई पोलीस, बेस्टचे वीज कर्मचारी आणि अग्निशमन दलाचे जवान घटनास्थळी दाखल झाले होते. आगीच्या ठिकाणी अजूनही काही लोक अडकले असण्याची भीती व्यक्त केली जात आहे. आग लागण्याचे नेमके कारण अद्याप समजू शकलेले नाही. अधिकाऱ्यांकडून घटनास्थळी परिस्थितीवर लक्ष ठेवण्यात येत असून बचावकार्य सुरू आहे.