मराठा समाजाच्या आरक्षणाच्या मागणीसाठी मनोज जरांगे पाटील हे मुंबईच्या दिशेने मोठ्या रॅलीसह रवाना झाले आहेत. या आंदोलनाला राज्यभरातून प्रचंड प्रतिसाद मिळत असून, घराघरातून पुरुष मंडळी मोठ्या संख्येने मुंबईकडे निघत आहेत. याच पार्श्वभूमीवर सोलापूरात महिलांची लगबग पाहायला मिळत आहे. घरातील पुरुष मंडळी उपाशीपोटी प्रवासाला निघू नयेत यासाठी महिला चिवडा, चकली, शेंगाच्या पोळ्या, कडक भाकरी, शेंगाची चटणी अशा खास पदार्थांची मेजवानी बांधून देत आहेत. न्याहारीसोबत दीर्घ प्रवासासाठी लागणारा डबा तयार करण्याचं काम देखील महिलांनी हाती घेतलंय. मात्र या तयारीसोबत घरातील पुरुष मंडळी मुंबईला निघत असल्याने महिलांच्या डोळ्यांतून अश्रू अनावर झाले. एका बाजूला आंदोलनासाठीचा उत्साह तर दुसऱ्या बाजूला कुटुंबियांना सोडताना आलेलं भावूक वातावरण अशी दुहेरी परिस्थिती प्रत्येक घराघरात पाहायला मिळत आहे.