सोलापूर : शनिवारी मध्यरात्री शहरात मुसळधार पाऊस झाला. छत्रपती संभाजी महाराज चौकाजवळील पुना नाका परिसरात पावसाचे पाणी नाल्यांमध्ये प्रचंड वेगाने वाहत होते. याच दरम्यान एक धक्कादायक घटना घडली.

मिळालेल्या माहितीनुसार, सतीश सुनील शिंदे (वय 36) हा रिक्षाचालक पुलावरून गाडी नेण्याचा प्रयत्न करत असताना नाल्याच्या प्रचंड प्रवाहात वाहून गेला. रात्रीच्या वेळी अचानक वाढलेल्या पाण्यामुळे हा अपघात घडल्याचे सांगितले जाते.

घटनेची माहिती मिळताच सोलापूर अग्निशामक दल घटनास्थळी दाखल झाले असून वाहून गेलेल्या रिक्षाचालकाचा शोधमोहीम युद्धपातळीवर सुरू आहे.

या घटनेमुळे परिसरात मोठी खळबळ उडाली असून, मुसळधार पावसामुळे नागरिकांना सुरक्षित राहण्याचे आवाहन करण्यात येत आहे.