सोलापूर जिल्ह्यातील आगळगाव परिसरात रात्री झालेल्या मुसळधार पावसामुळे चांदणी नदीला महापूर आला आहे. तब्बल नऊ तासांपासून उत्तर बार्शी तालुक्याचा संपर्क पूर्णपणे तुटला आहे. आगळगावातील नदीकाठच्या घरांमध्ये पाणी शिरल्याने ग्रामस्थांना रात्रभर जागून काढावी लागली. गेल्या दोन दिवसांपासून सुरू असलेल्या जोरदार पावसामुळे उडीद, कांदा आणि सोयाबीन पिकांचे मोठ्या प्रमाणावर नुकसान झालं आहे. चांदणी नदीला आलेल्या महापुरामुळे मांडेगाव, खडकलगाव, धसपिंपळगाव, देवगाव आणि कांदलगाव या गावांचा बार्शी तालुक्याशी संपर्क तुटला आहे. नागरिकांना सुरक्षित राहण्याचं आवाहन केलं जात आहे. मुसळधार पावसाचा जोर आणखी वाढण्याची शक्यता हवामान विभागाने व्यक्त केली आहे.