मंगेश कचरे, साम टीव्ही

पुणे रेल्वे स्थानकातून दानापूरच्या दिशेने निघालेल्या पुणे-दानापूर एक्सप्रेसमध्ये धक्कादायक प्रकार घडला आहे. धावत्या एक्सप्रेसच्या S2 बोगीमध्ये अचानक साप आढळून आल्याने प्रवाशांमध्ये एकच घबराट उडाली. गाडी क्रमांक 01449 मध्ये हा प्रकार घडला. साप दिसताच प्रवाशांनी प्रसंगावधान राखत रेल्वे प्रशासनाला माहिती दिली. त्यानंतर खबरदारीचा उपाय म्हणून ट्रेन दौंड कॉर्ड लाईन स्थानकावर थांबवण्यात आली. S2 बोगी तात्काळ पूर्णपणे रिकामी करण्यात आली.

सापामुळे निर्माण झालेल्या भीतीच्या वातावरणात प्रवाशांच्या सुरक्षेला प्राधान्य देत रेल्वे प्रशासनाकडून पुढील कार्यवाही करण्यात येत आहे. या घटनेनंतर दानापूर एक्सप्रेस दौंड कॉर्ड लाईन रेल्वे स्थानकावर गेल्या तासाभरापासून थांबवून ठेवण्यात आल्याची माहिती आहे. चालत्या एक्सप्रेसच्या बोगीत थेट साप आढळून आल्याने रेल्वेच्या प्रवासी सुरक्षेचा प्रश्न पुन्हा ऐरणीवर आला आहे. साप बोगीत नेमका कसा आला, याबाबत अद्याप स्पष्ट माहिती समोर आलेली नाही.