शिवसेना आणि भाजपमधील अंतर्गत कलह पुन्हा एकदा चव्हाट्यावर आला आहे. भाजपच्या ऑपरेशन लोटसमुळे नाराज होऊन शिंदेंच्या शिवसेना मंत्र्यांनी मंत्रिमंडळ बैठकीवर बहिष्कार टाकल्याचे समोर आले आहे. एकनाथ शिंदेंशिवाय एकही शिवसेना नेता मंत्रिमंडळाच्या बैठकीत नव्हता. ठाण्यासह राज्यात भाजपकडून ऑपरेशन लोटस सुरू आहे, अनेक शिवसेना नेत्यांनी भाजपमध्ये प्रवेश केला. त्यामुळे शिवसेनेत नाराजी असल्याचे समोर आले. त्यामुळेच मंत्र्यांकडून मंत्रिमंडळाच्या बैठकीवर बहिष्कार टाकण्यात आला आहे.

मंत्रिमंडळाच्या बैठकीला दांडी मारल्यानंतर शिवसेनेचे मंत्री मुख्यमंत्र्यांची भेट घेण्यासाठी पोहचले आहे. भाजपात होणारे पक्षप्रवेश आणि स्थानिक स्वराज्य संस्थांच्या निवडणुकीच्या पार्श्वभूमीवर शिवसेनेच्या नेत्यांमध्ये नाराजी असल्याचे सांगण्यात येत आहे. शिवसेना मंत्र्यांनी रविंद्र चव्हाण यांच्यावर नाराजी व्यक्त केली. शिवसेनेच्या कार्यकर्त्यांना आपल्या गळाला लावण्याचं काम रविंद्र चव्हाण करत असल्याचीही तक्रार शिवसेना नेत्यांकडून कऱण्यात येत आहे.