शिवसेनेचा 60वा वर्धापन दिन आज मोठ्या उत्साहात साजरा होत असून, खासदार फुटीनंतर प्रथमच दोन्ही गट स्वतंत्रपणे शक्तिप्रदर्शन करताना दिसत आहेत. उद्धव ठाकरे यांच्या नेतृत्वाखालील ठाकरेसेनेचा वर्धापन दिन मुंबईतील षण्मुखानंद सभागृहात पार पडत आहे. या कार्यक्रमासाठी पक्षाकडून जोरदार तयारी करण्यात आली असून, खासदारांच्या फुटीनंतर उद्धव ठाकरे काय भूमिका मांडणार याकडे सर्वांचे लक्ष लागले आहे. दुसरीकडे, उपमुख्यमंत्री एकनाथ शिंदे यांच्या शिवसेनेचा वर्धापन दिन सोहळा गोरेगाव येथील नेस्को सेंटरमध्ये आयोजित करण्यात आला आहे. या कार्यक्रमासाठी राज्यभरातून मोठ्या संख्येने पदाधिकारी आणि कार्यकर्ते उपस्थित झाले असून, शिंदेसेनेकडून भव्य शक्तिप्रदर्शनाची तयारी करण्यात आली आहे. दरम्यान, ठाकरेसेनेच्या उपनेत्या सुषमा अंधारे या कार्यक्रमादरम्यान भावूक झाल्याचे पाहायला मिळाले. त्यांच्या डोळ्यांत अश्रू अनावर झाल्याने उपस्थितांमध्येही भावनिक वातावरण निर्माण झाले.