ठाकरे गटाचा दसरा मेळावा म्हणजे फक्त रडगाणं असल्याची टीका शिंदे गटाचे नेते संजय गायकवाड यांनी केली आहे. आज आझाद मैदानात शिंदेसेनेचा दसरा मेळावा होणार आहे. तर दुसरीकडे शिवाजी पार्कमध्ये उद्धव ठाकरे गटाकडून दसरा मेळावा घेण्यात येत आहे. या दोन्ही मेळाव्यांची जय्यत तयारी सध्या सुरू आहे. यावेळी आझाद मैदानावर शिंदे गटाचे नेते संजय गायकवाड यांनी माध्यमांशी बोलताना ठाकरे गटाचा मेळावा म्हणजे फक्त रडगाणं आहे असं म्हंटलं आहे. ''आम्ही अनेक वर्षांपासून शिवतीर्थावर बाळासाहेबांच्या विचारांचं सोनं लुटण्यासाठी येतो. त्यात आम्ही कडवट हिंदुत्वाचे विचार आम्हाला एकायला मिळायचे. मात्र आता त्यांच्या मेळाव्यात हिंदुत्वाचे विचार नसतात. कॉंग्रेस आणि राष्ट्रवादीसोबत जाऊन त्यांनी बाळसाहेबांचे विचार सोडले आहे. त्यांचा मेळावा हा फक्त रडगाणं असतो.'' अशी टीका गायकवाड यांनी केली आहे. त्याचबरोबर आगामी विधानसभा निवडणुकीत 100 जागांवर दावा केल्याचं देखील गायकवाड यांनी म्हंटल आहे. 100 जागा मागू आणि 90 जागांवर जिंकून येऊ असं यावेळी बोलताना गायकवाड म्हणाले आहेत.