Sharad Pawar Health Update : राष्ट्रवादी काँग्रेस पक्षाचे अध्यक्ष शरद पवार यांच्या प्रकृतीबाबत एक महत्त्वाची अपडेट समोर आली आहे. खोकला आणि श्वसनाच्या त्रासामुळे (Respiratory Infection) त्यांना मुंबईतील ब्रीच कॅन्डी रुग्णालयात दाखल करण्यात आले होते.

डॉक्टरांनी दिलेल्या माहितीनुसार, सध्या शरद पवार यांच्या प्रकृतीत सुधारणा होत असून त्यांची प्रकृती स्थिर (Stable) आहे.

प्रकृतीत पुरेशी सुधारणा झाल्यामुळे त्यांना आज ब्रीच कॅन्डी रुग्णालयातून डिस्चार्ज मिळण्याची शक्यता आहे आणि ते लवकरच घरी परतणार आहेत.

मुंबईतील ब्रीच कॅन्डी रुग्णालयात उपचारासाठी दाखल झालेल्या शरद पवार यांच्या प्रकृतीची विचारपूस करण्यासाठी राजकीय आणि उद्योग क्षेत्रातील अनेक दिग्गजांनी रुग्णालयात जाऊन त्यांची भेट घेतली. मुख्यमंत्री देवेंद्र फडणवीस, उपमुख्यमंत्री एकनाथ शिंदे, राष्ट्रवादी काँग्रेसचे नेते प्रफुल्ल पटेल, मंत्री छगन भुजबळ, काँग्रेस आमदार विश्वजीत कदम आणि खासदार संजय राऊत यांच्यासह प्रसिद्ध उद्योगपती गौतम अदानी यांनीही रुग्णालयात जाऊन शरद पवारांची भेट घेतली आणि त्यांच्या प्रकृतीची आस्थेने विचारपूस केली.