शहापूर तालुक्यात रात्रीपासून मुसळधार पाऊस पडतोय. पावसाने अक्षरशः हाहाकार माजवला आहे. सतत कोसळणाऱ्या पावसामुळे भातसा धरणाचे तब्बल पाच दरवाजे अडीच मीटरने उघडण्यात आले आहेत.

धरणातून सोडण्यात आलेल्या पाण्यामुळे शहापूर–सापगाव–किन्हवली रस्त्यावरचा पूल पाण्याखाली गेला असून, वाहतूक पूर्णपणे ठप्प झाली आहे. यामुळे या मार्गावरील सुमारे ४० गावांचा संपर्क तुटला आहे. दरम्यान, भातसा नदीतील पाणी सापगावात शिरल्याने गावातील मोठा परिसर पाण्याखाली गेला आहे. परिस्थिती गंभीर बनू नये म्हणून महसूल विभागाचे अधिकारी व जीवरक्षक पथक या ठिकाणी तैनात करण्यात आले आहेत.

स्थानिक प्रशासनाकडून नागरिकांना सतर्क राहण्याचे आवाहन करण्यात आले असून, कोणतीही अनुचित घटना घडू नये यासाठी सर्व उपाययोजना करण्यात येत आहेत.