माऊली माऊलीचा जयघोष, 'ज्ञानोबा माऊली-तुकाराम' अशा मंत्रमुग्ध करणाऱ्या नामघोषात संत तुकाराम महाराजांची पालखी सोलापूर रस्त्याने मार्गक्रमण करत लोणी काळभोर येथे काल सायंकाळी पोहोचली. पालखी सोहळ्याच श्रद्धेने आणि भक्तिभावाने स्वागत करत लोणी काळभोरवासीयांनी पाहुणचार केला आहे.

देहुहून प्रस्थान केल्यानंतर पालखी दोन दिवस पुण्यात मुक्कामाला होती. त्यानंतर पालखी सोलापूर महामार्गाने पुढे निघाली असून, आजचा मुक्काम यवत येथे असणार आहे. पालखी सोहळ्या सोबत मोठ्या संख्येने वारकरी भक्त सहभागी झाले असून, अभंगवाणी आणि टाळ मृदंगाच्या गजरात वातावरण भक्तीमय झाले आहे.

प्रशासनाच्यावतीने सोहळ्याच्या मार्गावर आवश्यक ती सर्व तयारी करण्यात आली असून, पोलीस बंदोबस्तही कडक ठेवण्यात आला आहे. पुढील काही दिवसांत पालखी पंढरपूरच्या दिशेने वाटचाल करणार असून, लाखो भाविकांच्या उपस्थितीत विठुरायाच्या चरणी समर्पित होणार आहे.