देशाच्या राजकारणात सध्या एकच मुद्दा चर्चेत आहे तो म्हणजे वक्फ बोर्ड. लोकसभेत काल मध्यरात्री वक्फ दुरुस्ती विधेयक मंजूर झाले. याच विधेयकावर आज राज्यसभेत दिवसभर चर्चा सुरू होती. यावरच ठाकरे गटाचे खासदार संजय राऊत यांनी भाजपवर तुफान टोलेबाजी केली. तुम्ही खुश दिसत आहात, पण मुसलमानांची इतकी काळजी तर पाकिस्तानच्या मोहम्मद अली जिन्नांनाही नव्हती. जिन्नांचा आत्मा उठून तुमच्यात बसला आहे का? अशी टीका संजय राऊत यांनी केली. संजय राऊत हे आज राज्यसभेत चांगलेचआक्रमक झाले होते.

सत्ताधाऱ्यांनी हिंदुत्वाचा नारा दिला असला तरी आता तेच वक्फ बोर्डासंदर्भात मुसलमानांसाठी विशेष काळजी घेत आहेत. मला वाटायचं आम्ही हिंदू राष्ट्र बनवणार आहोत. पण आता गरीब मुसलमानांची काळजी घेण्याचा नाव एजेंडा सुरू झाला आहे. एकेकाळी तुम्ही मंगळसूत्र, गाय बैल मुसलमानांकडे जातील म्हणून आक्षेप घेत होता. मी हिंदुत्व वाचले आहे आमचा जन्मच हिंदुत्वासाठी झाला आहे, तुम्ही नवीन हिंदुत्वाचे नवीन मुल्ले बनले आहात असा टोला संजय राऊत यांनी भाजपवर राज्यसभेत लगावला.