राष्ट्रवादी काँग्रेसमधील दोन्ही गटांच्या विलीनीकरणाबाबत सध्या राजकीय वर्तुळात चर्चा सुरू आहेत. मात्र, या चर्चांवर खासदार संजय राऊत यांनी स्पष्ट भूमिका मांडली आहे. राष्ट्रवादी काँग्रेस (शरदचंद्र पवार) पक्षाचे विलीनीकरण होणे भावनिक, राजकीय आणि नैतिकदृष्ट्या शक्य नसल्याचे त्यांनी म्हटले आहे. शरद पवार यांचे राजकारणातील स्थान आणि त्यांचे नेतृत्व मोठे असून, त्यांच्याकडे दुर्लक्ष करणे कोणालाही शक्य नाही, असेही राऊत यांनी स्पष्ट केले.

छत्रपती संभाजीनगर येथील श्रीलेखा मंदिर ट्रस्टच्या जमिनीवरूनही संजय राऊत यांनी भाजप आणि सत्ताधारी गटावर गंभीर आरोप केले. या प्रकरणात जमिनीच्या व्यवहारांमध्ये गैरप्रकार झाल्याचा आरोप करत त्यांनी संबंधित नेत्यांवर टीका केली. राज्यातील सत्ताधारी पक्षांकडून वेगवेगळ्या मुद्द्यांवर राजकारण केले जात असल्याचा आरोपही त्यांनी केला.

छठपूजेच्या मुद्द्यावर बोलताना राऊत यांनी धार्मिक कार्यक्रमांना आपला विरोध नसल्याचे स्पष्ट केले. प्रत्येकाला आपापले सण आणि उत्सव साजरे करण्याचा अधिकार आहे. मात्र, धार्मिक कार्यक्रमांच्या माध्यमातून राजकीय शक्ती दाखवण्याचा प्रयत्न करणे चुकीचे आहे. उत्सवाच्या ठिकाणी राजकीय घोषणा देणे आणि त्याचा राजकीय फायद्यासाठी वापर करणे योग्य नसल्याचे त्यांनी सांगितले.

दरम्यान, वाढती महागाई आणि शेतकऱ्यांना दिवाळीनिमित्त देण्यात येणाऱ्या मदतीवरूनही त्यांनी राज्य सरकारला धारेवर धरले. सामान्य नागरिकांना महागाईचा मोठा त्रास सहन करावा लागत आहे. शेतकऱ्यांना दिलासा देण्याच्या घोषणा केल्या जात असल्या, तरी प्रत्यक्षात त्यांना किती मदत मिळते, असा सवाल त्यांनी उपस्थित केला.