उपमुख्यमंत्री अजित पवारांनी पुणे आणि पिंपरी चिंचवड महापालिकेच्या निवडणुकीत शहरातील कुख्यात गुंड आणि त्यांच्या परिवारातील सदस्यांना उमेदवारी दिल्याने नागरिकांच्या सुरक्षेचा प्रश्न ऐरणीवर आला आहे. पुणे शहरात आधीपासूनच कोयता गँग, भरदिवसा खून, चौकाचौकात हत्या यामुळे पुणेकरांमध्ये भीतीचे सावट असताना पुण्याच्या पालकमंत्र्यांनी थेट गुंडांना उमेदवारी देत एक प्रकारे त्यांना पोसत असल्याचे उघड झाले आहे. यावरच ठाकरे गटाचे खासदार संजय राऊत यांनी जोरदार हल्लाबोल चढवला आहे. महाराष्ट्रामध्ये असे वातावरण कधीच सुरू झाले नव्हते ते भारतीय जनता पक्ष, मिंदे आणि अजित पवारांनी सुरू केले आहे. राज्यातील सर्व गुंड हे अजित पवारांच्या पक्षात गेलेय. सगळे गुंड तुम्ही कोणत्याही गुंडाचे नाव घ्या आणि कोणत्याही गुंडांच्या टोळीचा संदर्भ द्या ते सगळे अजित पवारांच्या पक्षात आहे आणि हा पक्ष भाजपसोबत सत्तेमध्ये सामील आहे. अशा जोरदार शब्दात संजय राऊत यांनी अजित पवारांवर टीकास्त्र सोडले.