सांगली जिल्ह्यात एका शेळीला तब्बल १ लाख १ हजार रुपये असा विक्रमी दर मिळाल्याने परिसरात मोठी चर्चा रंगली आहे. साधारणपणे शेळीपालन हा पूरक व्यवसाय मानला जात असताना या अनोख्या व्यवहारामुळे सर्वांच्याच भुवया उंचावल्या आहेत.

विशेष म्हणजे या शेळीला मिळालेला दर एका म्हशीच्या किंमतीपेक्षाही जास्त असल्याची चर्चा होत आहे. या शेळीची उंची, वजन, जात आणि उत्तम बांधा यामुळे खरेदीदारांनी मोठी रक्कम मोजल्याचे सांगितले जात आहे. या व्यवहाराची माहिती समजताच आसपासच्या गावातील शेतकरी, पशुपालक आणि नागरिकांनी शेळी पाहण्यासाठी मोठी गर्दी केली आहे. अशी शेळी आम्ही कधी पाहिली नाही अशी प्रतिक्रिया अनेक शेतकऱ्यांनी व्यक्त केली.

या विक्रमी व्यवहारामुळे सांगली जिल्ह्यात शेळीपालन व्यवसायाकडे नव्याने पाहिले जात असून, पशुपालकांमध्ये उत्सुकता आणि आशा निर्माण झाली आहे. शेळीपालनातूनही चांगले उत्पन्न मिळू शकते हे पुन्हा एकदा सिद्ध केले आहे.