छत्रपती संभाजीनगरमधील नाथ व्हॅली शाळेमधून एक धक्कादायक प्रकार समोर आला आहे. शाळेतील क्रीडा शिक्षक अनिल देवरे यांनी चार ते पाच विद्यार्थ्यांना अमानुष पद्धतीने बेदम मारहाण केली. विशेष म्हणजे या मुलांना कपडे काढून मारले गेले असून, संबंधित व्हिडिओ सध्या सोशल मीडियावर जोरदार व्हायरल होत आहे.या प्रकारानंतर पालकांमध्ये संतापाची लाट उसळली असून, अनेकांनी शाळेच्या प्रशासनाकडे तक्रार दाखल केली.

या तक्रारींची गंभीर दखल घेत शाळा प्रशासनाने तत्काळ चौकशी सुरू केली. चौकशीनंतर दोषी आढळलेल्या क्रीडा शिक्षक अनिल देवरे यांची शाळेतून हकालपट्टी करण्यात आली आहे. हा प्रकार समोर आल्यानंतर शहरात शिक्षण संस्थांमधील शिस्तीचा मुद्दा पुन्हा ऐरणीवर आला आहे. विद्यार्थ्यांवर होणाऱ्या अशा प्रकारच्या शारीरिक शिक्षेवर तात्काळ प्रतिबंध घालण्याची मागणी पालकांकडून केली जात आहे.