बॉलिवूडचा दबंग सुपरस्टार सलमान खान याने नुकताच एक मोठा आणि धक्कादायक खुलासा केला आहे. तो सध्या मेंदूशी संबंधित तीन गंभीर आजारांनी त्रस्त असूनही आपल्या कामावर चिकाटीने लक्ष केंद्रित करत आहे. ‘द कपिल शर्मा शो’मध्ये उपस्थित राहिलेल्या सलमान खानने आपल्या प्रकृतीविषयी खुलं बोलत हे धक्कादायक सत्य सर्वांसमोर मांडलं आहे.

सलमाननं सांगितलं की, त्याला ब्रेन अ‍ॅन्युरिझम (Brain Aneurysm), एव्ही मॅल्फॉर्मेशन (AV Malformation) आणि ट्रायजेमिनल न्यूराल्जिया (Trigeminal Neuralgia) या तीन मेंदूशी संबंधित आजारांचा सामना करावा लागत आहे. या सर्व आजारांमध्ये तीव्र वेदना, स्नायूंचे आकुंचन आणि गंभीर त्रास होत असतो. विशेष म्हणजे ट्रायजेमिनल न्यूराल्जिया या आजाराला "सुसाइड डिसीज" असंही म्हटलं जातं, कारण या आजारातील वेदना सहन करणे अत्यंत कठीण असते.

तरीही सलमान खानने आपल्या जबाबदाऱ्या न मोडता, चाहत्यांसाठी चित्रपटांमध्ये काम सुरूच ठेवलं आहे. “प्रयत्न करत राहा, आयुष्य थांबत नाही,” असं म्हणत त्याने सकारात्मकतेचा संदेश दिला आहे.