पुणे: जिल्ह्यातील खेड तालुक्यातील खरपुडी गावात सैराट चित्रपटातील प्रसंगाची आठवण करून देणारी एक धक्कादायक घटना समोर आली आहे. अंतरजातीय प्रेमविवाह केल्याच्या कारणावरून, २८ वर्षीय विवाहितेचे अपहरण करून तिच्या पतीला बेदम मारहाण करण्यात आल्याचा प्रकार उघडकीस आला आहे. विशेष म्हणजे, ही घटना विश्वनाथ गोसावी आणि त्याची पत्नी प्राजक्ता गोसावी या दांपत्यावर घडली असून, दोघांनी अंतरजातीय प्रेमविवाह केला होता. या विवाहामुळे संतप्त झालेल्या पत्नीच्या कुटुंबीयांनी थेट त्यांच्या घरी जाऊन हल्ला केला, अशी प्राथमिक माहिती आहे.

या प्रकरणी प्राजक्ताच्या भावासह तिच्या आईसह १५ जणांविरुद्ध खेड पोलीस स्टेशनमध्ये जबर मारहाण व अपहरणाचा गुन्हा दाखल करण्यात आला आहे. या घटनेचा पोलीस तपास सुरू असून, घटनेनंतर परिसरात खळबळ उडाली. प्राजक्ताचा थांगपत्ता लागत नसून, पोलिसांनी तिला शोधण्यासाठी शोधमोहीम सुरू केली आहे.