Russia Ukraine War10 Indians Death News रशिया-युक्रेन युद्धात १० भारतीय नागरिकांचा मृत्यू झाल्याची माहिती केंद्र सरकारने शुक्रवारी सर्वोच्च न्यायालयात दिली. मृतांपैकी बहुतांश जण रशियन सैन्यात कराराच्या आधारे स्वेच्छेने सहभागी झाले होते. २६ भारतीयांच्या कुटुंबीयांनी दाखल केलेल्या याचिकेवर सुनावणी दरम्यान सरकारनं ही माहिती दिली.

मिळालेल्या माहितीनुसार, सरन्यायाधीश सूर्यकांत, न्यायमूर्ती विपुल पांचोली आणि न्यायमूर्ती जॉयमाल्या बागची यांच्या खंडपीठासमोर या प्रकरणी सुनावणी झाली. रशियात नोकरीच्या आमिषाने गेलेल्या २६ भारतीयांच्या कुटुंबीयांनी दाखल केलेल्या याचिकेत त्यांच्या नातेवाईकांची फसवणूक करून त्यांना युद्धात ढकलण्यात आल्याचा गंभीर आरोप त्यांच्या कुटुंबियांकडून करण्यात आला आहे.

केंद्र सरकारतर्फे अतिरिक्त सॉलिसिटर जनरल ऐश्वर्या भाटी यांनी न्यायालयात भूमिका मांडताना सांगितले की, याचिकेत नमूद २६ जणांपैकी १० जणांचा मृत्यू झाला आहे. परराष्ट्र मंत्रालय संबंधित कुटुंबीयांच्या सतत संपर्कात असून परिस्थिती हाताळण्यासाठी विविध स्तरांवर प्रयत्न सुरू असल्याचे त्यांनी नमूद केले. काही प्रकरणांमध्ये एजंट्सकडून दिशाभूल झाल्याची शक्यता नाकारता येत नसल्याचेही त्यांनी सांगितले.

याचिकाकर्त्यांच्या वकिलांनी मात्र, परराष्ट्र मंत्रालयाकडून पुरेसा प्रतिसाद मिळत नसल्याचा आरोप केला. यावर सरन्यायाधीशांनी या प्रकरणाकडे अत्यंत संवेदनशीलतेने पाहण्याची गरज असल्याचे म्हटले. रशियात गेलेल्या सुमारे २१५ भारतीयांपैकी २६ जणांच्या कुटुंबीयांनी न्यायालयात धाव घेतली आहे. उर्वरित प्रकरणांमध्येही मंत्रालय संपर्कात असल्याचा दावा करण्यात आला. तसेच मृतांचे पार्थिव भारतात आणण्यासाठी अनेक अडचणी येत असल्याचेही सरकारने स्पष्ट केले. दरम्यान, या घटनेमुळे परदेशात नोकरीच्या आमिषाने जाणाऱ्या तरुणांच्या सुरक्षिततेचा मुद्दा पुन्हा ऐरणीवर आला आहे. केंद्र सरकारने अशा प्रकरणांवर लक्ष ठेवून नागरिकांना आवश्यक ती मदत देण्याचे आश्वासन दिले आहे.