मुंबई : मुंबईतील गणेशोत्सव मंडळांसाठी एक आनंदाची बातमी आहे. मंडप उभारणीच्या वेळेस रस्त्यावर खड्डा खणल्यास महापालिकेकडून आकारण्यात येणाऱ्या दंडात वाढ होणार होती. मात्र, उपमुख्यमंत्री एकनाथ शिंदे यांनी वेळेत हस्तक्षेप करत गणेशभक्तांना दिलासा दिला आहे.

मुंबई महापालिकेकडून मंडप उभारणीदरम्यान खड्डा खणल्यास तीनपट दंड म्हणजेच १५ हजार रुपये आकारण्याचा प्रस्ताव होता. याविरोधात गणेशोत्सव मंडळांनी नाराजी व्यक्त केली होती. ही बाब उपमुख्यमंत्री एकनाथ शिंदे यांच्या निदर्शनास आल्यानंतर त्यांनी तातडीने महापालिका आयुक्त भुषण गगराणी यांच्याशी चर्चा केली. या चर्चेनंतर शिंदे यांनी स्पष्ट निर्देश दिले की, २०१७ पासून लागू असलेला मूळ दंड म्हणजेच दोन हजार रुपयेच कायम ठेवण्यात यावा. त्यामुळे महापालिकेच्या नव्या प्रस्तावित दंडातून गणेश मंडळांना मोठा दिलासा मिळाला आहे.