रत्नागिरी जिल्ह्यामध्ये पुन्हा एकदा भूकंपाचे सौम्य धक्के जाणवले आहेत. चिपळूण तालुक्यातील येगाव परिसरात भूकंपाचा केंद्रबिंदू असून रिश्टर स्केलवर याची तीव्रता २.७ इतकी नोंदवण्यात आली आहे. महिनाभराच्या अंतरात दुसऱ्यांदा भूकंप झाल्याने स्थानिक नागरिकांमध्ये भीतीचे वातावरण पसरले आहे. जिल्हा प्रशासनाने दिलेल्या माहितीनुसार, या भूकंपामुळे कुठेही जीवित किंवा वित्तहानी झालेली नाही. यापूर्वी १२ मार्च रोजीदेखील जिल्ह्याच्या काही भागात भूकंपाचे धक्के जाणवले होते. त्यानंतर आज पुन्हा एकदा जमीन हादरल्याने प्रशासनाकडून सतर्कतेचा इशारा देण्यात आला आहे. भूकंपाची तीव्रता कमी असली तरी वारंवार होणाऱ्या या हालचालींमुळे चिपळूण आणि परिसरातील गावांमध्ये चर्चेला उधाण आले आहे.