एकनाथ शिंदे यांच्या ‘ऑपरेशन टायगर’मध्ये सहभागी झालेले ईशान्य मुंबईतील ठाकरे गटाचे खासदार संजय दिना पाटील यांच्या कन्या आणि नगरसेविका राजुल पाटील यांनी रविवारी ‘मातोश्री’वर जाऊन उद्धव ठाकरे आणि आदित्य ठाकरे यांची भेट घेतली. या भेटीनंतर प्रसारमाध्यमांशी बोलताना राजुल पाटील यांनी आपली आणि वडिलांची भविष्यातील राजकीय वाट वेगळी असणार असल्याचे स्पष्ट केले.

मी उद्धव साहेब आणि आदित्य साहेबांना भेटण्यासाठी आले होते. माझी भूमिका मी त्यांच्यासमोर स्पष्ट केली आहे. मी पक्षातच असून त्यांच्यासोबत ठामपणे उभी आहे. माझे काम मी निष्ठेने करत राहीन. आज माझ्या मतदारसंघात त्यांचे स्वागत करणार आहे. मी माझे म्हणणे मांडले असून उद्धव ठाकरे यांनाही ते मान्य आहे. आमच्या कुटुंबात प्रत्येकजण स्वतःचे निर्णय घेतो. माझे वडील त्यांचा निर्णय घेतील, आणि मी माझा निर्णय जाहीर केला आहे, असे राजुल पाटील म्हणाल्या.