पुण्यात मनसे अध्यक्ष राज ठाकरे यांच्या उपस्थितीत झालेल्या बैठकीत मुळशी पॅटर्न फेम रमेश परदेशी यांना राज ठाकरेंनी चांगलंच सुनावल्याची माहिती समोर आली आहे. रमेश परदेशी यांनी अलीकडेच सोशल मीडियावर आरएसएसच्या संचालनाचा फोटो पोस्ट केला होता. त्या पोस्टमध्ये त्यांनी स्वतःला संघाचा कार्यकर्ता असल्याचं नमूद केलं होतं.

यावर राज ठाकरे यांनी थेट विचारलं, छाती ठोकून सांगतोस की मी संघाचा कार्यकर्ता आहे, मग आमच्याकडे टाईमपास का करतोस? एकाच ठिकाणी राहा. त्यावेळी उपस्थित कार्यकर्त्यांच्या समोरच राज ठाकरेंनी परदेशी यांना झापलं,अशी माहिती सूत्रांकडून मिळाली आहे. ‘पिट्या’ उर्फ रमेश परदेशी हे मनसे चित्रपट सेनेचे उपाध्यक्ष आणि शाखा अध्यक्ष आहेत. त्यांच्या या पोस्टमुळे पक्षातील वातावरण काहीकाळ तापलं होतं. मनसेच्या बैठकीत घडलेला हा प्रसंग सध्या पुण्यात राजकीय चर्चेचा विषय ठरला आहे.