मनसे अध्यक्ष राज ठाकरे यांची जाहीर सभा आज मिरा-भाईंदरमध्ये होणार असून, या सभेकडे संपूर्ण राज्याचे लक्ष लागले आहे. अमराठी व्यापाऱ्यांनी मोर्चा काढलेल्या ठिकाणीच ही सभा आयोजित करण्यात आली असून, मराठी अस्मितेच्या मुद्द्यावर पुन्हा एकदा वातावरण तापण्याची चिन्हं आहेत.

मनसेकडून या सभेची जोरदार तयारी करण्यात आली आहे. “मिरा-भाईंदरमध्ये वाघ येतोय” अशा आशयाची पोस्टर्स शहरात झळकली असून, मनसेच्या आक्रमक भूमिकेची झलक या प्रचारातून दिसून येतेय. काही दिवसांपूर्वी परप्रांतीय व्यापाऱ्याला मनसे कार्यकर्त्यांकडून झालेल्या मारहाणीच्या घटनेनंतर व्यापाऱ्यांनी निषेध मोर्चा काढला होता.

या पार्श्वभूमीवर राज ठाकरे आज काय बोलणार, कोणती भूमिका घेणार, याकडे सर्वांचे लक्ष केंद्रित झाले आहे. मराठी अस्मितेच्या मुद्द्यावर मनसेची पुढील रणनीती याच सभेत स्पष्ट होण्याची शक्यता आहे.