मुंबई महापालिका निवडणुकीच्या पार्श्वभूमीवर राज ठाकरे यांच्या मनसेने मोठा राजकीय डाव खेळला आहे. मराठी विरुद्ध अमराठी वाद तापलेला असताना, मनसेने थेट गुजराती आणि मुस्लिम उमेदवारांना उमेदवारी देत सर्वांचं लक्ष वेधून घेतलं आहे.

मनसेकडून वॉर्ड क्रमांक 177 माटुंगा येथून हेमाली भन्साली या गुजराती उमेदवाराला रिंगणात उतरवण्यात आलं आहे. याशिवाय वॉर्ड क्रमांक 188 धारावी येथून आरिफ शेख, तर वॉर्ड क्रमांक 209 भायखळा येथून हसीना माहीमकर हे मुस्लिम उमेदवार मनसेच्या तिकीटावर निवडणूक लढवत आहेत.

विशेष म्हणजे मुंबईत सध्या मराठी विरुद्ध अमराठी असा राजकीय वाद जोर धरत असताना, मनसेचा हा निर्णय अनेक अर्थांनी महत्त्वाचा मानला जात आहे. एकीकडे भाजप उत्तर भारतीय मतदारांना आकर्षित करण्यासाठी रणनीती आखत असताना, मनसेने अल्पसंख्याक आणि अमराठी समाजाला थेट प्रतिनिधित्व देत वेगळी राजकीय मांडणी केली आहे.