पावसाळ्यात सुरक्षेच्या कारणास्तव बंद करण्यात आलेला रायगड किल्ल्याचा पारंपरिक पायरी मार्ग अखेर पर्यटकांसाठी खुला करण्यात आला आहे. जिल्हाधिकारी किशन जावळे यांनी यासंदर्भात सुधारित आदेश जारी करत महत्त्वाचा निर्णय घेतला आहे.गेल्या काही दिवसांपासून रायगड परिसरात रेड व ऑरेंज अलर्ट लागू असल्यामुळे प्रशासनाने पायरी मार्ग बंद ठेवण्याचे आदेश दिले होते. यामुळे पर्यटकांचा हिरमोड झाला होता, तर स्थानिक व्यावसायिकांचे व्यवसाय देखील ठप्प झाले होते.

मात्र जिल्हाधिकाऱ्यांनी सुधारित आदेश काढून पायरी मार्ग पुन्हा सुरू करण्यास परवानगी दिली आहे. त्यानंतर महाड तालुका पोलिसांनी रायगड किल्ल्याच्या पायरी मार्गावर लावलेले बॅरेगेटिंग हटवले.या निर्णयामुळे पर्यटक आणि स्थानिक व्यावसायिकांमध्ये आनंदाची लाट उसळली असून, अनेकांनी रायगड किल्ल्याच्या पायथ्याशी छत्रपती शिवाजी महाराजांचा जयजयकार केला.