पुणे महानगरपालिकेच्या निवडणुकीदरम्यान प्रभाग क्रमांक 41 मध्ये बोगस मतदार पकडल्याचा गंभीर प्रकार उघडकीस आला आहे. शिवसेनेचे शहराध्यक्ष नाना भानगिरे यांनी या बोगस मतदारांना पकडून थेट पोलिसांच्या स्वाधीन केले आहे.

नाना भानगिरे यांनी आरोप केला आहे की, जवळपास एक ते दीड हजार बोगस मतदारांना वेगवेगळ्या जिल्ह्यांतून पुण्यात आणण्यात आले होते. यापैकी काही मतदारांनी प्रत्यक्ष मतदान केल्याचाही संशय शिवसेनेकडून व्यक्त करण्यात आला आहे. हा प्रकार लोकशाहीच्या प्रक्रियेवर घाला घालणारा असल्याचे शिवसेनेने म्हटले आहे. या प्रकरणात संबंधित बोगस मतदारांना पुण्यात आणण्यामागे प्रभाग क्रमांक 41 मधील राष्ट्रवादी काँग्रेसच्या उमेदवारांचा हात असल्याचा गंभीर आरोप शिवसेना शहराध्यक्ष नाना भानगिरे यांनी केला आहे. या घटनेनंतर परिसरात एकच खळबळ उडाली आहे.

या संपूर्ण प्रकरणाबाबत पोलिसांत अधिकृत तक्रार दाखल करण्यात आली असून, निवडणूक आयोगाकडेही लेखी तक्रार करण्यात आल्याची माहिती शिवसेनेकडून देण्यात आली आहे. दोषींवर तात्काळ गुन्हे दाखल करून कठोर कारवाई करावी, अशी मागणी शिवसेनेकडून करण्यात आली आहे.