उपमुख्यमंत्री अजितदादा पवार यांच्या जनसन्मान यात्रेला बारामतीमधून सुरूवात झाली, आज त्यांची जनसन्मान यात्रा पुण्यातील जुन्नर येथे दाखल झाली असून या यात्रेदरम्यान भाजप कार्यकर्त्यांकडून त्यांना काळे झेंडे दाखवण्यात आले आहे.

अजित पवारांच्या जनसन्मान यात्रेत भाजपाच्या माजी जिल्हा परिषद अध्यक्ष आशा बुचके यांच्यासह कार्यकर्त्यांनी काळे झेंडे दाखवत घोषणाबाजी सुरू केली. पर्यटन तालुका असताना शासकीय कार्यक्रम घेऊन घटक पक्षांना डावललं जात असल्याचा आरोप केला. अजित पवारांनी पालकत्वाची भूमिका पाळली नाही, याबाबत तीव्र शब्दात नाराजी व्यक्त करत आशा बुचकेंनी अजित पवारांच्या कार्यक्रमात काळे झेंडे दाखवत जोरदार घोषणाबाजी केली आहे.

दरम्यान अजित पवारांच्या ताफ्याला काळे झेंडे दाखवून, घोषणाबाजी करणाऱ्या भाजप नेत्यांसह आशा बुचके यांना पोलिसांना ताब्यात घेतले, काहीच वेळात तब्येत खालावल्याने आशा बुचकेंना उपचारासाठी रुग्णालयात दाखल करण्यात आले.