कल्याण शीळ रोडवरील वाहतूक कोंडीच्या प्रश्नावर अखेर तोडगा निघाला आहे. गेल्या अनेक वर्षांपासून प्रतीक्षेत असलेला आणि हजारो वाहनचालकांसाठी डोकेदुखी ठरलेला पलावा पूल आज कल्याण ग्रामीण मतदारसंघाचे शिवसेना शिंदे गटाचे आमदार राजेश मोरे यांच्या हस्ते लोकार्पण करण्यात आला.

या लोकार्पण सोहळ्याला स्थानिक नागरिक, कार्यकर्ते आणि अधिकाऱ्यांची उपस्थिती होती. पुलाच्या उद्घाटनामुळे कल्याण, डोंबिवली, शीळफाटा तसेच पलावा परिसरातील नागरिकांना मोठा दिलासा मिळणार असून, वाहतूक कोंडीला काही प्रमाणात आळा बसणार आहे.

यावेळी बोलताना आमदार राजेश मोरे यांनी सोशल मीडियावर टीका करणाऱ्यांना नाव न घेता टोला लगावला. आम्ही ट्विटरवर किंवा इन्स्टाग्रामवर टीका करत नाही. आम्ही प्रत्यक्ष रस्त्यावर उतरून काम करतो, हेच आमचं उत्तर आहे, असे ठामपणे सांगत त्यांनी मनसेचे माजी आमदार राजू पाटील आणि ठाकरे गटाचे जिल्हाप्रमुख दीपेश म्हात्रे यांना टोला लगावला.