जगदीप धनखड यांनी २१ जुलै रोजी देशाच्या उपराष्ट्रपतीपदाचा राजीनामा दिला. प्रकृतीच्या कारणामुळे राजीनामा देत असल्याचे धनखड यांनी स्पष्ट केले होते. राजीनामा दिल्याने उपराष्ट्रपतीपद रिक्त आहे. या पदाच्या निवडणुकीसंदर्भात एनडीएच्या प्रमुख बैठकीमध्ये मोठा निर्णय घेण्यात आला. उपराष्ट्रपतीपदासाठी एनडीएचा उमेदवार कोण असावा, हे ठरवण्याची जबाबदारी पंतप्रधान नरेंद्र मोदी आणि भाजप अध्यक्ष जे.पी. नड्डा यांच्याकडे सोपवण्यात आली आहे. त्यामुळे या पदासाठीचा उमेदवार कोण असेल, याकडे आता देशाचं लक्ष लागून राहिलं आहे. उपराष्ट्रपतीपदाच्या उमेदवाराच्या नावाची घोषणा लवकरच होण्याची शक्यता आहे.