राष्ट्रवादी काँग्रेस शरदचंद्र पवार पक्षाचे सर्वेसर्वा शरद पवार यांना रुग्णालयातून डिस्चार्ज देण्यात आला आहे. प्रकृतीत सुधारणा झाल्यानंतर आणि उपचार पूर्ण झाल्यानंतर शरद पवार यांना पुण्यातील रुबी हॉल क्लिनिकमधून घरी सोडण्यात आले. छातीत इन्फेक्शन झाल्यामुळे आणि अस्वस्थ वाटत असल्यामुळे २२ फेब्रुवारीला त्यांना रुग्णालयात दाखल करण्यात आले होते. चार दिवसांच्या विश्रांतीनंतर आज शरद पवारांना डिस्चार्ज देण्यात आला. रुग्णालयातून बाहेर पडतानाचे त्यांचे व्हिडीओ समोर आले आहेत. यावेळी त्यांच्यासोबत पत्नी प्रतिभा पवार आणि मित्र विठ्ठल मणियार होते. शरद पवार यांचे जवळचे मित्र विठ्ठल मणियार यांनी सांगितले की, 'पवारसाहेब यांची प्रकृती उत्तम असून त्यांनी सर्व डॉक्टरांचे आभार मानले. सर्व डॉक्टरांनी त्यांची काळजी घेतली त्यामुळे घरी जाताना त्यांनी सर्वांना अभिवादन केलं. साहेब बरे झाले की लगेच कामाला लागतात. काम आणि माणसं त्यांची विल पावर आहे.'