शिंदे गटाचे खासदार नरेश म्हस्के यांनी उद्धव ठाकरे यांच्यावर पुन्हा निशाणा साधला आहे. कोणी गाऱ्हाणं घातलंय. महापौर होऊ दे म्हणून! हे बघा, स्वप्न बघण्याचा अधिकार सगळ्यांनाच असतो. पण मागच्या वेळेस महापौर कसे आले हे सगळ्यांना ठाऊक आहे. शिंदे साहेबांनी विनंती केली होती फडणवीस साहेबांना, तेव्हाच महापौर आले. त्यांना त्यांच्या स्वप्नासाठी शुभेच्छा!

म्हस्के यांनी मुंबईतील ‘सत्याच्या मोर्चा’वर विरोधकांना चांगलंच सुनावलं. ते म्हणाले, मोर्चात कोणाची ताकद होती? शेकाप, राष्ट्रवादी, कम्युनिस्ट... यांचा मुंबईत काही प्रभाव आहे का? काँग्रेसचे प्रमुख नेते कुठे होते? फक्त चुकीचा गैरसमज पसरवण्याचा प्रयत्न करण्यात आला. त्यांनी मतदार याद्यांतील दुबार नावांच्या मुद्द्यावरून विरोधकांची कोंडी केली. हा विषय नवीन नाही. उद्धव ठाकरे युतीत असताना गफला झाला होता का? त्या वेळी मूग गिळून बसले होते काय? असा सवाल त्यांनी उपस्थित केला.