नांदेडच्या विष्णुपुरी शासकीय वैद्यकीय महाविद्यालयात सुरक्षारक्षकाच्या दादागिरीचा धक्कादायक प्रकार समोर आला आहे. भोकर तालुक्यातील खंडेराव शेंडगे आपल्या 12 वर्षांच्या मुलाला डोक्याला मार लागल्याने उपचारासाठी रुग्णालयात घेऊन आले होते. मात्र, रुग्णालयात प्रवेश करताच चिमुकल्याला उलटी झाली,आणि उपचार देण्याऐवजी सुरक्षारक्षकांनी वडिलांनाच ती उलटी साफ करण्यासाठी भाग पाडले. वाद झाल्यानंतर आणि दमदाटी केल्यानंतरच उपचार सुरू करण्यात आले. या संपूर्ण प्रकाराचा व्हिडिओ सोशल मीडियावर व्हायरल झाला असून, या व्हिडिओमध्ये रुग्णाचे नातेवाईक प्रचंड चिडलेले दिसून येत आहेत. नागरिकांकडून संबंधित सुरक्षारक्षकावर कारवाईची मागणी केली जात आहे.