मुख्यमंत्री युवाकार्य आणि प्रशिक्षण योजनेअंतर्गत प्रशिक्षण घेतलेल्या हजारो युवक-युवतींनी नागपूर हिवाळी अधिवेशनाच्या पार्श्वभूमीवर विधानसभेकडे लोटांगण मोर्चा काढण्याचा प्रयत्न केला. मात्र पोलिसांनी आंदोलकांना विधानसभेकडे जाण्याआधीच यशवंत स्टेडियम परिसरात अडवले. ११ महिने प्रशिक्षण दिल्यानंतर त्याच ठिकाणी रोजगार देण्याचं आश्वासन सरकारकडून देण्यात आलं होतं.

मात्र हे आश्वासन पूर्ण न झाल्याने प्रशिक्षणार्थी युवक-युवतींमध्ये तीव्र नाराजी पसरली आहे. ९ तारखेपासून या तरुणांचं आंदोलन सुरू असूनही सरकारकडून कोणतीही दखल घेण्यात आली नसल्याचा आरोप आंदोलकांनी केला आहे. यामुळे आज आंदोलन अधिक तीव्र आणि आक्रमक स्वरूपाचं झाल्याचं पाहायला मिळालं. यशवंत स्टेडियम परिसरात मोठ्या प्रमाणावर पोलीस बंदोबस्त तैनात करण्यात आला असून यावेळी विद्यार्थी आणि पोलिसांमध्ये झटापट झाल्याचे दिसत आहे.