मुंबई: येथील मालाड पूर्वेतील राणी सती मार्गावर बालाजी हॉस्पिटलसमोर असलेल्या वैष्णव हाइट्स इमारतीच्या १२ व्या मजल्यावर आज दुपारी भीषण आग लागली. सुरुवातीला ही आग ११ व्या मजल्यावरील बंद खोलीत लागली होती. दुपारी ३.४९ वाजता तिला लेव्हल-२ घोषित करण्यात आले. त्यानंतर आग १२ व्या मजल्यावरील सुमारे ६०० चौ.फुट क्षेत्र पसरत गेली आणि वरच्या मजल्यांवर प्रचंड धुराचे लोट पसरले. या आगीमुळे वेस्टर्न एक्स्प्रेस हायवेपासून स्थानकापर्यंतचा रस्ता पूर्णपणे बंद झाला असून घटनेचे भयावह दृश्य सोशल मीडियावर व्हायरल झाले आहे. अग्निशमन दलाच्या जवानांनी तातडीने घटनास्थळी जात आग विझवण्याचे प्रयत्न केले. विभागीय अग्निशमन अधिकारी, अतिरिक्त DFO, वरिष्ठ स्टेशन अधिकारी आणि स्टेशन अधिकारी यांच्या मार्गदर्शनाखाली सात फायर इंजिन्स, एक टर्नटेबल लॅडर, हायड्रॉलिक प्लॅटफॉर्म, दोन एरियल वॉटर टेंडर, चार जेट टेंडर, एक ब्रीदिंग अॅपरेटस व्हॅन आणि एक क्विक रिस्पॉन्स व्हेईकल घटनास्थळी दाखल झाले.

अधिकाऱ्यांच्या माहितीनुसार आग आटोक्यात आणली असून वरच्या मजल्यांवरील धूर बाहेर काढण्याचे काम सुरू आहे. मात्र, आगीचे नेमके कारण अद्याप समजू शकलेले नाही.