मुंबईकरांच्या जीवाशी खेळणारा लोकलमधील धोकादायक प्रवास आता इतिहासजमा होणार असल्याची शक्यता आहे.मध्य रेल्वेवर दररोज लाखो प्रवासी लोकलच्या दरवाजावर लटकून प्रवास करताना दिसतात. मात्र या प्रवासामुळे अनेकदा अपघात होऊन जीवितहानीही होते. अलीकडेच मुंब्रा–दिवा दरम्यान झालेल्या भीषण अपघातानंतर रेल्वे प्रशासनाने प्रवाशांच्या सुरक्षेसाठी कठोर पावले उचलली आहेत. लोकलच्या दरवाजावरील पन्हाळीचा पारंपरिक आकार बदलून आता धनुष्यबाणासारखा आकार देण्यात येणार आहे.

या नव्या रचनेमुळे प्रवाशांना दरवाजाला धरून लटकणे शक्य होणार नाही असा दावा रेल्वे प्रशासनाचा आहे. सध्या कुर्ला कारशेडमध्ये प्रायोगिक तत्त्वावर या बदलांची अंमलबजावणी सुरू करण्यात आली आहे. हा प्रयोग यशस्वी ठरल्यास लवकरच मध्य रेल्वेवरील सर्व लोकलमध्ये ही नवीन सुरक्षा यंत्रणा बसवण्यात येणार आहे.

यामुळे प्रवाशांचा जीव धोक्यात घालणारा दरवाजावर लटकून होणारा प्रवास थांबेल अशी आशा व्यक्त केली जात आहे. मात्र ही योजना प्रत्यक्षात कितपत प्रभावी ठरणार याकडे आता सर्वांचं लक्ष लागलं आहे.